دەستەی گەشتوگوزار: هەموو لایەنەکان ڕۆڵێان هەبووە لە زیاتر بوونی ژمارەی گەشتیاران نەک تەنها کەناڵی ئێن ارتی

240 views 11 ئاب 2016

Advert test

 دەقی روونكردنەوە  بۆ كەناڵی ئێن ئارتی عەرەبی :

دەستەی گشتی گەشتوگوزار بەردەوام رایگەیاندوە كە پێشخستنی كەرتی گەشتیاری پێویستی بە هاوكاری و پاڵپشتی سەرجەم لایەنەكان هەیە، بۆیە مافی خۆیەتی دەستخۆشی لە سەرجەم لایەنەكان بە تایبەت سەرۆكی حكومەت و وەزیری ناوخۆ و وەزیری شارەوانی و گەشتوگوزار بكات كە پاڵپشتی سەركەوتنی پلانی گەشتوگوزاریان بۆ هێنانی گەشتیار كردووە، هەروەها سوپاسی راگەیەندنەكان و دامەزراوە حكومیەكان بكات كە پاڵشتی پێشوەبردنی كەرتی گەشتیاری هەرێمی كوردستانیان كردوە و بەردەوام دەیكەن. دەستەی گەشتوگوزار بەردەوام بووە و بەردەوام دەبێت لە ناساندنی كەرتی گەشتیاری بە گەشتیارانی ناوخۆی عێراق و گەشتیارانی وڵاتانی بیانی، بۆ ئەمەش سەدان چالاكی جۆراوجۆری لە ناوخۆ و لە دەرەوەی هەرێمی كوردستان( كۆنفرانس، پیشانگا، ریكلام…..) كردووە و دەیان كەناڵی بیانی و عەرەبی بانگەشتی كوردستان كردووە و راپۆرتیان لەسەر گەشتوگوزاری كوردستان كردووە. چەندان گەشتی بۆ كەناڵ و رۆژنامەنووسانی عەرەبی ناو عێراق بۆ هاوینەهەوارەكان و ناوسروشت سازكردووە و راپۆرتیان لەسەر گەشتوگوزار كردووە، كەناڵی ئەلشەرقیە و ئەلعێراقیە هەفتانە راپۆرتیان لەسەر كوردستان هەیە و بەشی زۆریان لەسەر گەشتوگوزارە و دوابەدوای رێکخستنی کاری کۆمپانیاکانی هەرێم بۆ هێنانی گەشتار بەپێی رێنمایی تایبەت کە لەلاین بەرێز وەزیری شارەوانی وگەشت گوزار پەسەند کرا ، هەموو ئەمانە بە بەڵگە لە دەستەی گەشتوگوزار هەیە.

لەم ساڵ لە مانگی یەك تاكو ئێستا دەستەی گشتی گەشتوگوزار بەردەوام بووە لە هێنانی گروپی كۆمپانیاكانی گەشتیاری ( تاكو ئێستا زیاتر لە 15 كروپی كۆمپانیای بانگەشتی كوردستان كردوون كە هەرگروپێكی زیاتر لە 15 بۆ 40 كۆمپانیا بووە) گەورەترین گروپیش 108 كۆمپانیای بیانی و 72 كۆمپانیای عێراقی بوون كە بەشداریان لە كۆنفەرەنسی نێودەوڵەتی كۆمپانیاكانی گەشتیاری لە مانگی ئازار لە شاری هەولێر كرد، پلانی نوێی دەستەی گەشتوگوزار هێنانی گەشتیار بووە لە رێگەی كۆمپانیاكانی گەشتیاری بە شیێوەی گروپ، سەدان گرێبەست بۆ هێنانی گەشتیار لەگەڵا كۆمپانیاكانی عێراقی واژوو كراون، چاڤی لاند ئەم گەواهیەمان بۆ دەدات كە چەند جارێك دەستەی گشتی گەشتوگوزار گروپی كۆمپانیای بۆ بردوون بۆ ئەوەی گەشتیاریان بۆ ببەن. ئەم چالاكیانە بە پلانی پێشوەختە بە هاوكاری چەندان لایەن كراون، هەموو ئەمانە لە لایەك و هاوكاری و كارئاسانی ئاسایشی هەرێمی كوردستان لە لایەك كە لەسەر راسپاردەی سەرۆكی حكومەت كارئاسانی زۆریان لە بازگەكان بۆ هێنانی گروپی گەشتیاری لە رێگەی كۆمپانیاكان كرد.

ئیتر نازانین چۆن و بەچ مافێك و بە چ بەڵگەیەك كەناڵی ئێن ئارتی عەرەبی بە مانشێت و سەر دێر دەنوسێت: ( بە هۆی كەناڵەكەیان گەشتیار بۆ هەرێمی كوردستان زیادی كردووە)!؟ ئێمە هیوامان دەخواست ئەمە راست بوایە بۆ ئەوەی دەستخۆشیان لێبكەین و سوپاسیان بكەین، بەڵام بە كەم سەیركردنی هەوڵ و ماندوبوونی سەرجەم لایەنەكان و حكومەت و بە تایبەت دەستەی گشتی گەشتوگوزار، بۆتە مایەی نیگەرانی دەستەكەمان.

لە كاتێكدا ئێمە زۆر چاك دەزانین ئەم كەناڵە تەنیا ریكلامی بۆ چاڤی لاند كردووە و هیچ بایەخیان بە شوێنەكانی تری گەشتیاری هەرێم نەداوە، كەچی زیاتر لە 170 شوێنی سروشتی و كاتبەسەر بردن و شوێنەوار و جۆرەكانی گەشتیاری و زیاتر لە هەزار شوێنی مانەوە هەیە و لەم كەناڵە باسی هیچان نەكراوە. ئَێمە چاڤی لاند و كۆڕەك تەلەفریك و پانكی گەشتیاری و مازیلاند و ماجدی لاند و فامڵی فان و تەلەفریكی بابلۆ و ئەكواپاركی هەولێرو …. بە بەشێكی گرنگ لە چالاكیەكانی گەشتیاری كوردستان بۆ راكێشانی گەشتیار دەزانین، بەڵام ناكرێ رۆڵی 17 تاڤگە و دەیان هاوینەهەوار و جوانیەكانی سروشت و دیمەنی ئەشكەوتە بەفرینەكانی كوێستان و دەیان رووبار و پێشكەوتنی كەرتی گەشتیاری فەرامۆش بكەین. لێرەوە رایدەگەیەنین كە ئاماری هاتنی گەشتیاران لە سەرجەم بۆنەكان و لە ئاماری كۆتای ساڵ بەردەوام لە سنووری پارێزگای هەولێر و دهۆك و سلێمانی و ئیدارەی گەرمیان زیادی كردووە، ئەم جەژنەش بە هەمان شێوە ژمارەی گەشتیارانی هەرسێ پارێزگا و ئیدارەی گەرمیانیش زیادی كردوە بە هەمان شێوەی ساڵانی 2007 تاكو 2013 كە ساڵانە لە 30% زیادی دەكرد، لە جەژنی رەمەزان و قوربانی ساڵی 2015 ژمارەی گەشتیاران زیادی كرد كە ئەوكات كەناڵی ئین ئارتی عەرەبی بوونی نەبوو.

ئەگەر كەناڵی ناوبراو هۆكار بێت بۆ زیادكردنی گەشتیارانی سنووری سلێمانی!! ئێمە دەپرسین چ هۆكارێك ژمارەی گەشتیارانی دهۆك و هەولێری بەو رێژە بەرزە لە جەژنی رەمەزان زیادكرد!!؟؟؟ بۆیە نەدەبوو كەناڵی ناو براو ئەو هەڵە گەورەیە بكات و هیچ نرخێك بۆ پلان و بەرنامە و ماندوبوونی هیچ لایەك دانەنێت و بڵی بە هۆی كەنالی ئێن ئارتی ژمارەی گەشتیاران زیادی كردووە!!؟؟ هەموومان دەزانین كەناڵەكە ماوەیەك لە پێش جەژن دامەزراوە و شانازی دەكات گەشتیاران بە هۆی كەناڵەكە بۆ جەژن زیادی كردووە، بەڵام هیچ لۆژیكێك قبول ناكات بە ماوەیەكی كورت ئەو كاریگەریە گەورەی هەبوبێت!؟ هیوادارین لە داهاتوو ئەم رۆڵە گەورەی هەبێت و هاوكارێكی باشی دەستەی گشتی گەشتوگوزار بێت. دەستەی گشتی گەشتوگوزاری هەرێمی كوردستان

Advert test